جمال السنوسي

حاجة منك حاجة فيني بتحتويني بي عيونك ترسميني وتكتبيني وتقري فيني وبي مشاعرك تلمسيني وغصب عني تدخليني جوه قلبي تسكنيني وتلهميني وتلهبيني وتحكميني وتظلميني في قليبك تسجنيني وفي دروبك تتوهيني ولي مساربك ترشديني وكل غيرك تمنعيني ليا حبك تمنحيني وتسعديني يبقى شوقك بعتريني حاجة منك حاجة فيني تخلي شوقك يعتريني ويحتويني وابدا أسأل متين تجيني

بكرة حنرجع متل الأوّل نسقي مشاعر الشوق الطوّل وأشوف عينيك وأسرح فيها وكتير أتجوّل حلاتا عينيك لما بتبسم تقولي خلاص ما تتغزّل وعارفة بريدك وأنا عن ريدك ما بتحوّل بكرة حنرجع ونبدا الريدة صفحة جديدة تكتبي عشقك واكتب عشقي تليد وتليدة ونفرح بينا ونفرح لينا فرحة شديدة وايامنا الحلوة الكانت وكانت تاني نعيدها وتبقى الخطوة البيني وبينك ماهي بعيدة بكرة حنرجع ويفرح لينا جميع الكون وتبقى الدنيا حلوة جميلة في أحلى عيون ونسهر نحنا نرسم ونضحك ونحكي شجون والقمرة تعاين للشوق الباين الكلو جنون وبكرة حنرجع وما حنتفارق مهما يكون .......... ...... .... .. . جمال السنوسي

حلمت بيك أنا وإنت  ماشين سوا فتحنا قلبين للهوى ما خفنا  هيجان النوي مدينا كفنا  للسلام ودسينا إيدنا في الغرام ومرقنا سرنا في الكلام لا عدّت الخطوة البعيدة ولا كانت الفرقة الختام مرّت حدود الإنهزام وإستبشرنا خير والخير كتير مرات نمش ومرات نطير مرات بنوصل مسرعين ومرات نقول باقي الكتير والريد مأصل في القلوب كل يوم بيسال عن المصير لا عرفنا كيف ولا حد وين والعمر فات نسمة عبير حلمت بيك ماسك إيديك وشايف عينيك مليانة بي  سر العشق بقراها لامن أنشرق وابدا القراية من جديد مرات غرب ومرات شرق واصبح قلق ومنك بحاول أنعتق وكيف إنعتق وجوفي بالشوق بتحرق يتشابا ليك قلبي الرهيف أبداً مقامك ما لحق أنا بعترف  بي كل ولف قلبي في بحرك غرق ........ ..... .... ,.. جمال السنوسي

الليلة عيدك وكل يوم في الدنيا عيدك إنت يا أملي ورجاي يا كل أحلامي المعاي يا ريتني أقدر للسنين أشيلها من عمري وأزيدك وأبقى نبضة في وريدك وأبقى شاعر لي قصيدك وأبقى فنان أرسمك لوحة وأجيدك وأبقى غنّاي وأغني ليك إنت البريدك وأبقى كتّاب ويبقى قلبي عنوان بريدك وأبقى درويش وأدخل مسيدك أمسك الطار وأنقّر أوصفك وامدح نشيدك ما الليلة عيدك وكل يوم في الدنيا عيدك وبقولا ليك الناس بريدو من زمان ومافي ريد زي ما بريدك    

نفاج الضو المن عينيك والعتمة نهار وضجة أشواق في موج اصوات عاكسا التيار والضو فرحان يطلع اسوار يرسم اشجار ومرات فنان يدوزن اوتار ما اصلو الضو المنك فيك المارق لينا وجاي عليك تمتد الخطوة ما بيننا وبيك اقمار الكون والشمس عينيك وياريت الضو ينشال في الايد كنا ملينا العتمة شمس ونسجنا شعاها الجانا جريد وباقي الافراح مستنية باكر يبقى صباحك ليها العيد

مواعيدك للفرح عنوان تفرهد فيهو أحلامنا ونحقق غاية الإنسان أنا وإنت قلب إثنين مستف بالحنين أشجان وبيرسم حدنا الفاصل بين الذكرى والنسيان   مواعيدك شمس طالعة تنور في السما السابعة وتسكن ضفة النيلين قمر ضوّاي ونجوم لامعة سعادة زول بعيش دنياهو وتكون أحلامه متتابعة   مواعيدك نور نبراس فرحة عيد ولمة ناس غنا وصفّيق كهارب زفة للأعراس إمام أدى   صلواته وكنيسة دقت الأجراس   مواعيدك شعاع الطيف بيرسم في رمال القيف حزمة ضوء وربيع ألوان بعطر في نسايم الصيف وحميم جيران وقت يمشوا يسلموا على الغريب الضيف   مواعيدك شُرفة للافراح بطلة وجهك الصبّاح يجيك بلبل يكون صدّاح يغرد للوصوف ينداح وتبسمي إنت للدنيا تضمدي فيها أي جراح        

حكاية ... وحكاية في حكايتك كنت أوّل وكنت تاني وكنت آخر كنت عادي وكنت ماهر كنت إنسان وكنت ساحر كنت ناسي وكنت فاكر كنت ماضي وكنت حاضر .. .. وفي حكايتي كنت أولى وكنت تانية وكنت آخر كنت آخر صفحة في نص الكتاب وكنت آخر نقطة في صدر الخطاب وكنت آخر لمحة في عز الشباب وكنت آخر قسمة في علم الحساب .. .. في حكايتك وفي حكايتي ألف قصة كل يوم وكل قصة ليها أوّل وكل أوّل ليهو قصة نبدا نحسب قصة أولى وقصة تانية وحتى خمسة وتاني لسه ألف خمسة وتاني نبدا ألف خمسة ونبدا ونسة إنتي قلتي لا ..إنت قلت ما نسيتك لا .. بتنسى ويبدا زعلك قبل أزعل ويبقى فكرك بكرة ترحل حتى دمعك مرة يقصر ومرة يطول وابدا اضحك زي عيونك لمّا أبكي وتاني أحكي من البداية وأقول بحبك وانتي حبك هو الحكاية ومافي غيرك بيملا عيني ولي النهاية .. .. جمال السنوسي