الاثنين، 15 يوليو 2019

ألقاك وين

________
ألقاك وين
لوعارف المكان
ماكان سألت بلقاك وين

ألقاك وين
في سهرة الليل والقمر
في ضل نهارات انحضر
في مرفأ الشاطيء النهر
واللا في محطات السفر

ألقاك وين
وانا زول مسافر في طريق
ضيع ملامح سكتو
رسام بلون في جدار
وغالبو تحديد فكرتو
ربان مسافر من زمن
من غير يحدد رجعتو
وأديب بألف في الفصول
وخايف يدوّن قصتو
ألقاك وين
في ضي أماني محتفل
في نور حلم بيشع بعيد
في ماضي جاي منتشي
فيهو الامل لصباح جديد
في بسمة تزخر بالوعود
في عيون طفل بسام سعيد
في سيرة جاية بالعديل
في يوم فرح والدنياعيد

وألقاك أنا
يا إنت يا كل المنى
وانسى لحظات العنا
واستف الجوف بالغنا
ومعاك يتم كل الهنا
وأكون هناك واكون هنا
وأكون دوام جنبك أنا
........
جمال السنوسي
جدة
14 يوليو 

ليست هناك تعليقات:

إرسال تعليق