لمن جيتك
.......................
لمن جيتك شايل الشوق
وليك القلب مليتو حنان
كنت بفكر أنك زيي
حافظ الريدة من ازمان
الا لقيتك معاي متغير
ولا اديتني شعور بأمان
زي النحن سنين أغراب
وكل البينا ماضي وكان
وينها وعودك لي يا زول
وينو الريد الكان بستان
وينو العهد الكان مكتوب
جوة قلبونا ليهو ضمان
عشنا سنين اجمل ريدة
كل من فينا سعيد فرحان
مرة نساهر جنب القيفة
فوقنا قمر كمان طربان
صورته بترقص فوق الموجة
ونحن نردد في الالحان
ومرة نسافر زي الغيمة
نسرح ونمرح في التوهان
نسقي قلوبنا مطرة ريدة
وفيها الشوق بكون مليان
هل معقولة نكون اغراب
بعد الريد نعيش في هوان
وتبقى سنيننا الجاية عجاف
نمشي في سكة دون عنوان
انا مستغرب من الحاصل
وانا والله موش غلطان
لو سمعت كلام من غيري
اي كلام زور وبهتان
لو فكرت براك تسيبني
انت وحاتك بس خسران
انا في ريدك خسرت سنين
وحتى العمر صبح كملان
وعداً مني بشيل اشواقي
وارجع بيها لاي مكان
وتاني وحاتك ما حتشوفني
ولا في الطيف لو حلمان
....................
جمال السنوسي
تعليقات
إرسال تعليق