منو القال ليك تسكنني
تبقى النبض جوة الروح
من الوراك تسافر فيني
وتلحق بي وين ما اروح
وعارف انت دخول القلب
عندي انا غير مسموح
لأنه قليبي ومن قبلك
ياما كثير عانى جروح
فكيف بالله بقيت تعرف
انه لقاك بيرد الروح
وإنه عيونك كثير حلوة
وإنه وجيهك ديمة صبوح
بنسى معاك كل تعبي
اسرح فيكا وليكا ابوح
اقول الكاتمو في جواي
وأبقى معاك انا المفضوح
كفاية علي اشوف عينيك
وكل ضلام بيبقى صباح
كفاية علي تطل قمرة
اقول شعري وفيك انداح
كفاية علي سلام ايديك
تنثر فيني عبير فواح
تنور كل حنايا القلب
تبقى البسمه ليهو وشاح
يفرهد ورد في البستان
تبقى الدنيا عيد وأفراح
أبسمل ليك ما شا الله
أغني معاك واكون مداح
امدح فيك اوصف فيك
اقول العندي بي كل صراح
بحبك انت يا اجمل زول
بحبك جد ومافي مزاح
.......
جمال السنوسي
تعليقات
إرسال تعليق