شوارع الحِلة
............
يا شوارع الحلة كيفك
وكيفو حال أشجار بيوتنا
والميادين الفيها كورة
والدكاكين الفاتحة ناصية
والعواميد بالليل ضمنة
لما تقفل بتبقى فورة
والكشاتين في النهارات
والجوامع في القراءات
في الجمع الكهف سورة
وبيت عرس والناس تزعرد
لعريس في الغربة رسل
والعروس قبلانة صورة
والخدار في البوكس حايم
والحريم عاملات حمايم
يشترن كل واحدة دورة
كم طفل مرقوا بيجروا
بي فرح في عيون اطلوا
كل لعبة هم حضورها
يا حليل شكلة ولادنا
لما يلعبوا في بلادنا
كل شكلة بسيطة طورها
والمطر الفينا صب
يروي بالخير والمحبة
والنسائم حنين شعورها
وداية مارقة في اعتيادها
جاهزة
ماشة للولادة
بت فلانة تمت شهورها
عم فلان في الكرسي نايم
في السلام مرات يناغم
من حديقة معلي سورها
يا حليل شاي صباحنا
لفة الكسرة و ملاحنا
واللبن مالينو كورة
كل لمحة فيك جميلة
يا شوارعنا الاصيلة
كل لوحة فيك صورة
......................
جمال السنوسي
تعليقات
إرسال تعليق